Prachtige busreis naar Meppel en Staphorst
Op 8 juli hebben we een prachtige busreis naar Meppel en Staphorst gemaakt.
8 juli 2015 Busreis Zonnebloem Afdeling Den Ham naar Staphorst
Verslag gemaakt door Tineke Maneschijn.
Overal Zunnebloem’m
Woensdag gung’n wej weer op pad
met 39 man’n en vrouw’n; ja ’t was mej wat.
Ok vrejwillegers waar’n der un stel
en verwen’n, dat deed’n ze al heel snel.
Ok Ally Moaneschien was as komiek weer present,
we hoev’n zulf niks te doen, word’n allene verwend.
’t Weer was eerst niet mooi, ’t reeg’n dat’t smaktn
mar wej zaat’n mooi dreuge in de busse en lacht’n.
Wej zaat’n joa mooi in un hele fijne bus
met un heftruck en takel, un hele goeie klus.
En met wat drukk’n en trekk’n en un haantie
kwaam’m wej in de busse, op un stoel an de kaante
De riem’m goed vaste zo word’n oons ezegd
want aanders… bej un ongeluk kwaam’m wej lillijk terecht.
Wej vertrökk’n um half elf vanof ’t Lieverdinck
dus mooi op tied, dat was altied un heel dink.
Richting Ommen en zo overal binn’ndeur
het reeg’n dat ’t smakt’n, mar wej zaat,n mooi dreuge, dus nik gien gezeur.
Richting Meppel; ondertuss’n word’n wej al verwend
met snoepies deur Betsie; wej zaat’n versteld!
Oonze chauffeur was’n heel vlotte proater
zien name was Jan.
Vertell’n van alle ploatsies woar aw langs kwaam’m
ja, die kun er wat van.
Zo kwaam’m wej bej Meppel zachies anelaand
bej Restaurant de Drie Kalkovens.
Doar stun’n de toafels al mooi gedekt
wej kreeg’n lekkere soep, broties, beleg en drink’n
En un grote croquette; echt te gek
en was ’t bortie leeg… dan word’n zo weer wat nejs neerezet.
Toen kwam iemand vertell’n, ’t was de baas van ’t hele spul,
hoe de kalkovens waar’n ontstoan.
Hoe mergel uut de grott’n vanuut Limburg
met boten noar Drente was egoan.
Met schepen vol turf en schelp’n, veur cement
dat word’n dan vermaal’n veur huuz’n
en zo bleef dat lange zo goan.
Het lag doar zo mooi, doar an’t water
met mooie plezierjacht’n, die lang kwaam’m vaar’n
en eendegesnater.
Mar wej moss’n verdan, zo stund op ’t program.
dus eerst noar de wc want wej zol’n zo verdan.
De bocht doar was krap, mar uuteinluk is t gelukt
de deure kún dichte, al was’t met völ gezucht.
Want dat plekkie, véurdaj kun’n goan zitt’n
was zó krap, de bocht koj hoast nie umme
En hele moale nie weer umme.
’t Was pass’n en meet’n, veurdaj kon’n plass’n
toen ien biene noar buut’n, dan de aander der achteran
en zó um de bochte, het was wél eem’m zweet’n.
Toen met un zwaai, de busse weer in
wej hadd’n lekker egeet’n en de boek weer vol
de bloase weer leeg, en hadd’n ’t weer goed naor de zin.
Richting Giethoorn; wej dacht’n wej goat toch niet met, en in de boot?
want dat wordt verzoep’n, is die boot wel zo groot?
Mar de chauffeur lach’n in zien voessie
want hej wus joa wel de weg
Reed langs völle mooie plekkies
noar Giethoorn Noord.
Wej waar’n vrogger vake in Giethoorn
op vekaansie met de kinder, en een tent
Want mien moeke kwam uut Wanneperveene
van oorsprong, dus wej waar’n doar bekend.
Langs mooie boerderiegies, sommigen groot mar ok soms heel klein
mooie tuun’n, riet’n daken, kleine raampies, heel fijn.
Want doar kreup’n de jonges, as ze vrejen wol’n stiekum deur
ja, tóch kond’n ze d’r ok vaken wat van heur!
Bovv’n de deur’n veuran in ’t huus, in ’t gruun
un mooie levensboom in ’t wit
ja ’t was un heel mooi gezicht.
’t Was echt geniet’n met zo’n goeie chauffeur
en zo zachies an waar’n wej in Staphorst
bij restaurant Kisteman anelaand.
Doar kreeg’n wej koffie of thee met un dikke plakke cake
en drink’n zovól aj woll’n, wej waar’n heel tevree.
Mar ’t mooiste mos toen nog kom’m
der kwaam’m twee vrouwleu an
Zej waar’n zon bettie oonze leeftied
mar kwebbel’n, ja doar kon’n ze wat van.
Zej kon’n vertéll’n en proat’n over Staphorst
en over kleer’n, hoe ’t vrogger was
van klein kind en jonge keerls en hoe ’t toen was.
Hoe de kleer’n word’n edraag’n
en wanneer, deur groot en deur klein.
Ok met brulft’n en begrafenis
ok al die sieroad’n, heel arg fijn.
Op ’t leste moss’n Gerrie Broekate
en Ally der natuurlijk niet onderuut
Zej word’n in ’t goeie goed eheez’n
van ondergoed, tot rouw en trouw.
Met musse en pet, sieraad en speld
mar ’t word’n in dizze tied toch völle te lastig
dus lag’t veur mooi in ’t grote kabinet.
Zo now en dan kwam ’t nog te veurschien
en dreug’n ze ’t wel is in ’t net.
En die 2 vrouwleu… zó vertell’n
’t was echt gien kruus
zej hadd’n der zulf zó’n lol in.
Mar wej moss’n weg noar huus
misschien is ’t wat veur ’t Lieverdinck
word’n al ezegd.
In de busse kreeg’n wej lekkre boll’n
lekker groot en vars, en drink’n toe
de chauffeur gaf toen vol gas.
Zo kwaam’m wej teeg’n zes uur weer in Den Ham
vrejwilligers, buschauffeur, zorg
iedereen die hier an met hef ewarkt.
Wej hadd’n un hele mooie Zunnebloemereise
met eerst reeg’n, later volop zun.
Deur wat wej hebt eziene en eheurd hebt
oen umgang met oons en zorg, gekheid en hulp
’t was geweldig!!!
En wej hoopt tot un volgende keer.
