Zonnebloem gaste hebbe weer Zonnendaag!
In eine good gevölde zaal van ’t Raodhoes zote einen daag nao ’t Swaree onder andere ouk zon 80 gaste van Zonnebloem aafdeilinge ZônBlierick en Blariacum, vol verwachting klaor veur ut programma.
Nao ein welkomswoord van ’t personiel van ‘Kefee ’t Volle Viltje’ en os aller Han kos de lol beginne.
Nao de nummers 3 en 4 van de letste Liedjesaovend waas ’t tied veur ’t kersverse dreejspan um zien opwachting te make. Terwiel blaoskapel Judasca ‘De Wortel en de Pin’ speulde kwaam ’t groet gezelschap van de Wortelepin de buun op en waord Prins Leon en zien adjudante John en Roel aan ’t publiek geprissenteerd. Dees dreej Bliërickse Blaage zien gen onbekinde in ’t Raodhoes, want al mierdere jaore organiseert eure vrindegroep dao jaorliks ein drökbezoch Oktoberfest. Zinge is Prins Leon alles behalve vreemp, dus ’t dreejspan brach ein speciaal veur de gelaegenheid geschreve liedje ten gehure.
Naodet zeej achter de taofels op de buun hadde plaatsgenaome waord de ton veur de buutereedner klaor gezatte. Dit kier ein dame oet Oestrum genaamp ‘Lilly de Grote’. Wie ze zelf zaet, ‘klein van stuk’ met eure 1,50m, daorum had ze ein keuketrepke mei um baove de rand van de ton oet te komme. Ze vertelde euver de veur- en naodeile van zoe klein zien en wie ze ens in de sauna eine hiel aparte ‘wats’ um de oere kreeg. Zeej makde plaats veur de Oldtimers, ein onderdeil van Venlona, die op diverse bekinde melodieë eigentiedse en lokaal aangepasde tekste zonge. Zoe ware ze onder andere op zeuk nao eure smartphone, want zeej (of weej allemaol?) kinne nimmer zonder.
Maar de Wortelepin had nog mier veur zien publiek in petto. De buun waord ruum vreejgemak veur eine groete groep van de Tanzgarde Krefeld-Stahldorf. As stewardesse en piloëte oetgedos makde zeej met os ein reis euver de ganse wereld, waobeej idderein versteld stond van ’t baetere akrobatische goei-en-smietwerk. Daomei krege ze geregeld de hand opein. De vraog veur ein zugabe kos helaas neet waere gehonoreerd, want de volgende artieste stonde al te trappele in de coulisse. De Träöt Zengers kwame al zingend de zaal in en mingde zich in ’t publiek. Inkele alde Vastelaovesliedjes kwame in ein geïmproviseerde versie veurbeej. Zeej waorde al gauw weer gevolg door liedjes 2 en 1 van de Liedjesaovend. Os vrijwilligster Tiny zoor gruuëts te kieke wie eure kleinzoon Steve Spengler same met Teun Paulussen ’t winnende liedje ‘Noow we d'r toch zien’ ten toniele brach.
As aafsloeter had de Wortelepin nemus minder as Gé Deenen gecharterd en dae kreeg binne de kortste kiere de hendjes opein en zelfs sommige vutjes van de vloer. Same met ’t dreejspan zong hae der loestig op los, wies der hiel spietig ein ind kwaam aan deze prachtige middaag veur os gaste van de Zonnebloem.
We meuge zondermier stelle det de Wortelepin eur met det moeie programma ein groet plezeer gedaon haet en ein hertelik DANKEWAAL verdeend!
